Антонина Семёновна Кривощёкова-Гантман чужис Юсьвинскӧй районісь Вижелово деревняын. Школа бӧрсянь велӧтчис Кудымкарскӧй педучилищеын. Сыбӧрын помаліс Ленинградскӧй университет. Сылӧн удж вӧлі йитӧм Коми-Пермяцкӧй институткӧт. Институтын уджавтӧн вӧлісӧ лӧсьӧтӧмӧсь программаэз, школьнöй небöггез, методическöй пособиеэз велӧтіссез понда. Сыбӧрын Антонина Семёновна уджаліс Пермскӧй педагогическӧй институтын, велӧтіс студенттэзӧс. Уджаліс кывчукӧррез да велӧтчан небӧггез лэдзӧмын.
Антонина Семёновна пуктіс ыджыт пай коми-пермяцкӧй кыв исследуйтӧмӧ, лэдзис топонима сьӧрті книгаэз. Ӧтлаын Раиса Михайловна Баталовакӧт лӧсьӧтісӧ да лэдзисӧ сэтшӧм тӧдчана уджжез коми-пермяцкӧй кыв сьӧрті, кыдз «Коми-пермяцко-русскӧй словарь» (1985 во) да «Коми-пермяцкӧй орфографическӧй словарь» (1992 во).
