Немтинова Галина Ильинична [1] шогмис февраль 2 лунö 1934 воö Кудымкарскöй районiсь Ёгвинскöй с/советiсь Рунцова деревняын колхозниккез семьяын. 1949 воö помалiс семилетньöй школа, сыбöрын – Кудымкарскöй педагогическöй училище (1953). Педучилище помалöм бöрын Галина Ильинична кык год уджалiс начальнöй классэзiсь велöтiсьöн Гайнскöй районiсь Чажеговскöй семилетньöй школаын. 1955-60 воэзö велöтчис Пермскöй государственнöй педагогическöй институтын медодза коми-пермяцкöй группа öктöмын.
Институт помалöм бöрын Галина Немтиноваöс ыстiсö уджавны Кудымкарскöй педучилищеö, кытöн сiя уджалiс роч да коми-пермяцкöй кыввез сьöртi велöтiсьöн куимдас год сьöрна. Сiдз Галина Ильинична юралiс училищеись студенттэз педагогическöй практикаöн, вит год сьöрна заведуйтiс училищелöн заочнöй отделеннёöн.
Кыдз методист Галина Ильинична чулöтiс ыджыт удж коми-пермяцкöй кыв сьöртi начальнöй классэз понда программаэз, учебниккез да методическöй пособиеэз гижикӧ да аркмӧтікӧ. Öтлаын мöдiк велöтiссезкöт Г.И.Немтинова лöсьöтiс 27 быдкодь изданнё. Сідз, Галина Ильинична лоӧ школьнӧй вуджӧтан кывчукӧрлӧн, серпаса азбукалӧн да «Тӧд жӧ, тӧд» сборниклӧн авторӧн.
Аслас ыджыт удж понда Галина Ильинична наградитöм «Отличник народного просвещения» знакӧн, «Ветеран труда» медальöн да почётнöй грамотаэзöн.
Содтӧт литература:
1. https://комиокруг.рф/nasha-gordosty/nemtinova-galina-ilyinitchna-rod-v-1934.html
[1] Гордость Пармы: биографический справочник. - Кудымкар: Коми-Пермяцкое книжное издательство, 2008. - 568 с.
