- Частицаэз [1] -ко, -нибудь, -либо гижсьöны мöдiк сёрни торрезкöт кырöлок пыр: мый-либо, кин-нибудь, кытшöм-нибудь, кöр-либо, вай-ко, сет-ко.
- Условнöй вежӧртаса кадакыввезкöт кö частица гижсьö торйын: Оз ветлы кö сiя талун врач дынö, ашын сёр ни лоас. Локтас кö сiя месся одзжык, сет сылö книгасö.
- Частицаэз пö, тай, ли, ни, эд, инö, да, и, я, жö, а, вöлись, бы гижсьöны торйын: Важын ни эд пö нiя олöны эта городын. Адззывлiн я тэ стройканымлiсь биэсö?
- Повелительнöй наклоненнёа кадакыввезкöт да целевöй союззэз туйö употребляйтчикö частица мед гижсьö торйын: Мед бура велöтчыны, колö уна занимайтчыны. Мед нiя кывзасö миянлiсь висьтасьöмсö.
- Частицаэз дзирс, дзар, медся, стрась, чим, вель, куш, зэв, бель нимтаннэзкöт, урчитаннэзкöт да кадакыввезкöт гижсьöны торйын: чим гöрд, дзирс пемыт, дзар югдiс, бель чочком, вель ылын, зэв ыджыт, медся вылын, стрась чöскыт, куш сьöд.
Частица НЕ гижöм
- Частица НЕ гижсьö öтлаын сэк, кöр кылыс сытöг оз употребляйтчы: невна, нетопыр, незкӧдь.
- Частица НЕ гижсьö öтлаын отрицательнöй нимвежаннэзкöт да отрицательнöй урчитаннэзкöт: некин, некытшöм, немымда, некöда, некытчö, некытiсь, некысянь, некыт, некöр.
- Причастиеэзкöт частица НЕ гижсьö öтлаын: Миян колхозас абу невелöтчись челядь. Некывзiсь вöлыс понда ме заптi шатёк.
- Частица НЕ кадакыввезкöт да деепричастиезкöт гижсьö торйын: не мунны, не сьывны, не видзны; не орсöмöн, не сьылöмöн, не пукалöмöн.
- Частица НЕ гижсьö öтлаын эманиммезкöт, нимтаннэзкöт да урчитаннэзкöт, кöр нiя частицаыскӧт мыччалöны виль понятие: ыджыт – неыджыт, ылын – неылын, горӧн – негорӧн. Эттшöм кыввесö туйӧ вежны не частицатöг кыввезöн сэтшöм жö вежӧртасын: неыджыт – учöт, неылын – матын, негорӧн – гусьӧн.
! Частица НЕ гижсьö торйын сэк, кöр лоӧ отрицаннёöн, а оз аркмöт виль кыввез: Керкуыс не ыджыт, а учöт. Отирыс тыдалiсö не ылын, а матын.
[1] Баталова Р.М., Кривощёкова-Гантман А.С. Коми-пермяцкий орфографический словарь. Кудымкар, 1992. 280 с.
