Коми-пермяцкöй орфографическöй правилоэз медодззаись вöлiсö утвердитöмöсь 1938-öй годö августын, а декабрьын петiсö печатись. Сэтчӧ вӧлісӧ пыртöмöсь школьнöй учебниккезiсь правилоэз.
Сёрöнжык орфографическöй правилоэс совершенствуйтсисö, 1945 годӧ вöлi лэдзӧм виль орфографическöй кывчукӧр. Материалсö словарь понда öктiс Великöй Отечественнöй война вотöдз Спиридон Федотович Грибанов, а введеннёсö да правилоэз гижис Анна Трофимовна Мошегова. Мöдiк изданнёыс эта словарьлöн (содтöм да исправитöм) петiс 1955-öй годö.
1966 годö петіс коми-пермяцкöй орфографическöй словарь, кӧда вылын уджаліс специальнӧй орфографическӧй комиссия. Эта кывчукӧрӧ вӧлісӧ содтӧмӧсь виль правилоэз, вежӧмӧсь мукӧд важ правилоэз.
Ӧння кадӧ мийӧ пользуйтчам орфографическӧй кывчукӧрӧн, кӧда петіс 1992 воӧ. Лӧсьӧтісӧ сійӧ Баталова Раиса Михайловна да Кривощёкова-Гантман Антонина Семёновна кипод увтын. Кывчукӧрӧ ӧктӧм да пыртӧм 20000 гӧгӧр кыв. Кывчукӧрын гижӧм коми-пермяцкой орфографиялӧн общой принциппез йылісь.
