Нимтаннэз гижсьöны öтлаын:
а) мед- приставкаöн: медъюгыт, медныж, медучöт;
б) не частицаöн (не частица вежöртас сьöртi матын приставка дынö): неучöт, непаськыт, нетом.
! Не частицаöн аркмöм нимтаннэз позьö кокнита вежны матына вежöртаса кылöн: неучöт – ыджыт, непаськыт – векнит, нетом – пöрись.
! заимствуйтöм нимтаннэз, кöдна аркмöмась не частицаöн, гижсьöны роч орфография сьöртi: неряшливöй, неаккуратнöй, небрежнöй;
в) -кодь, -вевья суффикссэзкӧт: басöккодь, улькодь, лöзвевья;
г) -рöма кывкöт: льöрöма, виррöма, сарöма;
д) кӧр аркмисӧ ас- нимвежан кыввужись -коддя, -ныра, -сяма кыввезӧн: аскоддя, ассяма, асныра;
е) -увтся, -дорся, -вывся, -весьтся, -сайся, -кадся, -сувда, -сора, -пöвса послелоггезкӧт: ваувтся, туйдорся, томкадся, куимпöвса, васайся;
ж) кӧр аркмисӧ ӧт- кыввужись да -кузя, -гора, -кыза кыввезісь: öткузя, öтгора, öтпасьта, öткыза;
з) -годся (-вося) кывкöт: куимвося, витгодся.
Нимтанэз гижсьöны торйын не частицакӧт, кӧр эм паныта висьталöм: Кагаыс не учöт, а ыджыт. Морт вöлi не том, но вына.
Нимтаннэз гижсьöны кырöлок пыр:
А. кӧр аркмисö кык нимтанiсь и мыччалöны виль рöм: лöз-чочком, югыт-гöрд, сьöд-чочком;
Б. кӧр кык öткодь нимтан употребляйтчöны вынсьöтан вежöртасын: кузь-кузь, чорыт-чорыт, курытся-курыт;
В. кӧр кык нимтан пантасьӧны собирательнöй вежöртасын: сюра-пеля, идъя-зöрья, йыла-ёся.