Безличнöй сёрникузяэз – этö сэтшöм односоставнöй сёрникузяэз, кöднаын сказуемöй дырни абу и оз вермы лоны подлежащöй: Тöлöн одз пемдö. Югдö жагвыв.
Безличнöй сёрникузяэз асланыс вежöртас сьöртi овлöны неöткодьöсь. Ныын висьтассьö вӧрвалӧн, животнöйлöн, мортлöн состояннё йылiсь, ны переживаннёэз йылiсь.
Видзöтам примеррез: 1. Юрöс поткöтö. 2. Петассэз дойдiс шерöн. 3. Вирдалö и гымалö. 4. Чожа зэрас.
Безличнöй сёрникузяэз вермöны лоны распространённöйезöн и нераспространённöйезöн: Ар. Кöдздöтiс. Талун куимöт лун ни лымьялö.
Сказуемöйыс безличнöй сёрникузяын вермас мыччассьыны неӧтік способ сьӧрті:
- безличнöй кадакылӧн: Кынтö. Пемдö.
- личнöй кадакылӧн безличнöй вежӧртасын: Нырö вачкис льöмпу цвет дукöн.
- неопределённöй формаа кадакылӧн: Эна велöтчиссезлö мунны походö. Тöння лун кошшыны.
- урчитанӧн: Ӧтöрын кöдзыт. Вöрын пемыт. Школаöдз матын.
- фразеологизмöн, кöда мыччалö мортлiсь или вӧрвалісь состояннё: Сылöн он петö. Андрейка мунiс армияö, этасянь мамыслöн сьöкыт вöлi сьöлöм вылын.
- Кыввезöн охота, рад, жаль, можно, нельзя öтлаын инфинитивкöт или сытöг. Сказуемöй составын вермас лоны и отсасяна кадакыв: Туруныс, батя, кыдз чай, охота заваритны да юны, но кытчö воштiсян — мöссэзлö колö (И.Минин). Мылякö жаль лоис стариктö, нельки сьöлöм ёжгыльтчис (В.Климов).
Неопределённöй формаа глагол дырни вермöны лоны кыввез; позьö, колö, некытчö и мöдiккез: Вöрын пондö пемдыны ни. Колö одзлань ни мунны.
