Кондратий Михайлович Мошегов чужис 1881 воö Кочёвскöй районiсь Дурово деревняын. Велöтчис Казанись семинарияын, кытiсь 1901 воö петiс велöтiсьöн. Уджавны пондöтчис Косинскöй районiсь Чазёва деревняын. Чожа лоис вежöртана, кытшöм сьöкыт уджавны велöтiсьöн, кöр абу челядь одзын чужан кыв вылын медодзза небöг – шыпасчукöр (азбука). Сiйöн К.М.Мошегов кутчисьö чулöтны удж азбука лöсьöтöм сьöртi.
1908 воö сы кипод увтiсь петö челядь понда велöтчан небöг, кöда пондö шусьыны «Букварь для пермяцких детей на чердынском наречии». Одзкылын автор велöтiсь понда лöсьöтöм отсöт, кытöн мыччалöм аскодясö кылыслiсь да мукöд пассэз йылiсь.
1909 воö петö мöдiк, кöда шусьö «Книга для чтения и практических упражнений на пермяцком языке». Сiя жö кадö Мошегов аслас деньга вылö Казаньöдз иньдöтö велöтчыны челядьöс.
Революция бöрын одзлань нуöтö отирлö колана удж: лöсьöтö небöггез, öктö важ олан йылiсь материал – легендаэз, сказкаэз, гöтрасян обычайез, чукöртö му пытшкись кольччöм предметтэз. Чужан кыв тöдöм туйдöтö Мошеговöс öтiк кыв вылiсь мöдiк кыв вылö вуджöтан удж дынö. Вуджöтö А.С.Пушкинлiсь «Чериалiсь да чериок йылiсь сказка», И.А.Крыловлiсь басняэз. Уджалö велöтiсьöн Кочёвскöй районiсь школаэзын, юралö Косинскöй роноöн.
1937 воö К.М.Мошегов, кыдз и уна мöдiк вына отир, вöлi репрессируйтöм.
Содтӧт литература: 1. https://rusneb.ru/catalog/000200_000018_RU_NLR_DIGIT_11156/ (позьӧ видзӧтны 1908 вося букварь)
- https://rusneb.ru/catalog/000200_000018_RU_NLR_ONL1_89/ (позьӧ видзӧтны 1909 вося небӧг).
