Питю Öньö (Зубов Андрей Никифорович) шогмис крестьянскöй семьяын ноябрь 25 лунö 1899 воö Кудымкарскöй районiсь Верх-Иньва посадын.
Верх-Иньвенскöй сельскöй школа помалöм бöрын, 4 во велöтчис Юрлинскöй высшöй начальнöй училищеын. Кык во уджалiс телеграфистöн.
1922 воö велöтчис Сыктывкарскöй Коми институтын и уджалiс Коми издательствоын. 1923 воö Зубов поступитiс Пермскöй госуниверситетiсь филологическöй факультет вылö, сэк жö уджалiс велöтiсьöн, детскöй домись заведующöйöн, велöтiсьöн Пермскöй советско-партийнöй школаын. Аслас уджын Зубов одзлань нуöтiс идея коми-пермяцкöй письменностьлiсь аркмöтöм.
1927 воö университет помалöм бöрын Зубов бертiс округö, вит во сьöрна уджалiс Кудымкарскöй педагогическöй техникумын естествознаннё сьöртi велöтiсьöн, сыбöрын – Коми-Пермяцкöй окрисполкомлöн научно-исследовательскöй бюроын. 1934 воö А.Н.Зубов кутчисьö велöтчыны Пермскöй научно-исследовательскöй институлöн аспирантураö.
Гижны Андрей Никифорович пондiс 1922 восянь. Сылöн кывбуррез печатайтчисö газетаэзын да округись литературно-художественнöй сборниккезын, Коми АССР журналлэзын.
А.Н.Зубов – автор медодзза учебниккезлöн да пособиеэзлöн, терминологическöй словарьлöн, бура тöдiс коми-пермяцкöй фольклор. Сыöн вöлi öктöм фольклор сьöртi уна материал, ыджыт вниманнё сiя торйöтiс сказкаэзлö. 1934 восянь А.Н.Зубов лоис СССР-ись писателлез Союзлöн членöн.
1937 воö Зубовöс арестуйтiсö, шуисö, что сiя лоö контрреволюционнöй организацияэзлöн членӧн, а сiдз жö отсалö германскöй разведкалö. Сентябрь 8 лунö 1937 воö А.Н.Зубовöс вийисö. 1956 воö сійӧ реабилитируйтiсö.
Гордость Пармы: биографический справочник. - Кудымкар: Коми-Пермяцкое книжное издательство, 2008. - 568 с.
Содтӧт литература:
- http://enc.permculture.ru/showObject.do?object=1803759954&viewMode=B_1803401803&link=1
- http://kpolibrary.ucoz.ru/publ/pisateli_komi_permjackogo_okruga/andrej_nikiforovich_zubov_gizhislon_olan_tuj/5-1-0-8
- http://arch.permculture.ru/handle/permculture/2725
