Тудвасева Зинаида Константиновна – коми-пермяцкöй лингвист, педагогическöй наукаэз сьöртi кандидат, коми-пермяцкöй кыв сьöртi ведущöй методиcт.
Зинаида Константивна чужис октябрь 5 лунö 1947 годö Юсьвинскöй районiсь Урманова деревняын. Велöтчис Крохалёвскöй восьмилетньöй школаын да Купросскöй шöрöт школаэзын.
1972 годö Пермскöй государственнöй педагогическöй институт филологическöй факультет коми-роч отделеннё велöтчöм бöрын поступитiс РСФСР-ись образованнё сьöртi Министерствоын национальнöй школаэз понда научно-исследовательскöй институтö. Уджалiс НИИ-ын старшöй научнöй сотрудникöн. Сiя жö кадö велöтчис аспирантураын и 1975 годö дорйис кандидатскöй диссертация «Послелоггез коми-пермяцкöй кылын и нiйö велöтан методика» тема вылö.
Учёнöйöс интересуйтö финно-угорскöй кыввезлöн зорамöм, билингвизм сьöртi проблемаэз. Зинаида Константиновна уна годдэз уджалö коми-пермяцкöй кыв сьöртi программаэз вылын, национальнöй школаэз понда велöтчан пособиеэз да небöггез вылын, методическöй пособиеэз лöсьöтöм вылын. Сы кипод увтын петiсö неӧтік дас научнöй публикация.
Сылӧн удж вылына донтӧм, Зинаида Константиновна наградитӧм «Знак почёта» орденöн, «За доблестный труд» да «Ушинскöй нима» медаллезöн, «Отличник народного просвещения» да «Заслуженный учитель школы РСФСР» почётнöй званнёӧн.
Содтӧт литература:
- https://ru.wikipedia.org/wiki/Тудвасева,_Зинаида_Константиновна
- https://dic.academic.ru/dic.nsf/ruwiki/1377363
- https://rusneb.ru/catalog/004034_000032_PEGUB-RU_Пермская+ГОУБ_EK_56614/
