Фёдор Любимов (куліс 1851 воӧ) – миссионер, Соликамскӧй Свято-Троицкӧй Соборись Протоирей. Сы йылісь, кыдз морт йылісь, тӧдса ӧддьӧн етша. Тӧдса, мый Фёдор Любимов вӧлі медодззаӧн, кин вуджӧтіс коми-пермяцкӧй кыв вылӧ ыджыт небӧг: Бур юӧр (Евангелие) Матфей сьӧрті (1823). Рукописьыс вӧлі ыстӧм Москваӧ, но сэтӧн кольччис куйлыны архивын. Сылӧн кипод увтісь кольччис удж – «Краткие грамматические правила, принадлежащие к знанию пермяцкого языка» (1838). Грамматикалӧн одзкылын Фёдор Любимов сетӧ пермяцкӧй кывлӧ ӧтласа характеристика, мыччалӧ ассис уважительнӧй отношеннё кыв дынӧ. Одзлань исследователь мыччалӧ, кыдз колӧ гижны ыджыт да учӧт шыпассэз, торья параграффезын сетӧ знаменательнӧй да служебнӧй сёрни торрезлӧн грамматическӧй категорияэзлӧ характеристика, вайӧтӧ примеррез, кадакыввезлісь мыччалӧ спряженнё. Грамматика помын сетӧм коми-пермяцкӧй кыв вылын лыддисян да неыджыт тексттэз.
Сідзжӧ сы кипод увтісь петіс «Дело о рассмотрении грамматики пермского языка, составленной священником Фёдором Любимовым» (1838).
