Кыв чужис пыдын кадö, кöр морттэзлö öтлаын олiкö да уджалiкö пондiс ковны мыйкö висьтавны öтамöдлö.
Мирас кыввез кык тысячася унажык. Ны коласын эмöсь родственнöй кыввез, или кыв семьяэз. Нiя аркмисö сысянь, что первобытно-общиннöй строй коста, а мукöдпырся и серöнжык, кыввес пыр торьясьлiсö: öтiк кыв вермис янсавны кынымкö диалект вылö, а диалекттэз, торья территорияэз вылын функционируйтiкö, пöртчисö торья кыввезö.
Коми-пермяцкöй кыв пырö финно-угорскöй кыв позӧ. Эта семьяö, коми-пермяцкöйся да коми-зырянскöйся, пырöны эшö сэтшöм кыввез: удмуртскöй, марийскöй, мордовскöй, эстонскöй, финскöй, карельскöй, саамскöй, мансийскöй, хантыйскöй, венгерскöй, и мöдiккез. Коми- пермяцкöйлöн медматiсь родственнöй кыввезöн лоöны коми-зырянскöй да удмуртскöй, эна куим кылыс öтлаасьöны пермскöй группаö.
Ученöйез лыддьöны, что финно-угррез олiсö восточнöй Европаын. Кама да Волга юэз гöгöр Уральскöй керöссэз дынöдз. Кама дорын отирыс олöмась неыджыт увтыррезӧн. Веккез сьöрна öтлаасьлiсö да янсавлiсö уна народдэз и кыввез, а 14 -15 веккезö ны коласiсь торьясисö коми-зырянскöй да коми-пермяцкöй кыввез.
