Коми-пермяцкöй кыв лоö чужан кылöн неöтiк тысяча морт понда, кöдна олöны Россия пасьта, но унажыкыс олöны Коми-Пермяцкöй округын. Торья местаэзын отирлöн сёрни лоö ассяма, кöда тыдалö фонетика, лексика, да грамматика ладорсянь: мыр и мырöв, чилькöтны и высьтыны, йöл и йöв. Ассяма признаккез сьöртi диалектнöй сёрни торйöтны говоррез, диалекттэз да наречиеэз вылö.
Говор — этö олан места сьöртi сёрнилöн медучöт тор. Сы вылын вермасö баитны кынымкö деревняын или посадын, нельки öтiк деревняын. Местнöй говоррес öддьöн уна. Асланыс öткодь признаккез сьöртi говоррес аркмöтöны диалекттэз, а диалекттэз öтлаасьöны наречиеэзö (видзöт содтöтiсь карта).
Öння коми-пермяцкöй языкознаннёын диалекттэсö öтлаöтöны кык ыджыт сёрниö (наречиеö): ойвывся (севернöй) да лунвывся (южнöй). Кыкнан сёрни ас пытшкас видзö аскоддя шыэз (фонетика), кывчукöр (лексика), морфология да синтаксис.
Ойвывся сёрнилöн диалекттэз учёнöй-лингвисттэз сьöртi колö лыддьыны «эловöйезöн» («л» кыдз шы пантасьö кыв одзын, кыв шöрын и кыв конецын). «В» ойвывся сёрниын пантасьлö только кыв пондöтчикö: вöр, важ, вöл и с.о. Р.М.Баталова исследованнёэз сьöртi ойвывся сёрниын оз пантасьö -жуг суффикса кыввез. Кывчукöрлöн аскоддяыс кокнита казяссьö кыввезын: данасьны (чужйисьны), лёльыт (небыт), сё (сто), истöг (би шедтан) и с.о.
Ойвывся сёрнилöн аскоддяыс, кыдз диалектология велöтан предмет, ас гöгöрас чукöртiс уна учёнöй-лингвисттэзöс, этнограффезöс. Öткоста колö казьмöтны Г.А.Нечаевöс, Р.М.Баталоваöс, А.С.Кривощёкова-Гантманöс, А.С.Лобановаöс, Р.П.Дмитриеваöс, О.А.Гагаринаöс, Л.Г.Пономарёваöс, Е.Н.Федосееваöс. Ны коласiсь быдыс бöрйис этö сёрнисö, чукöртiс диссертация понда материал, гижис статьяэз.
Ойвывся диалекттэз вылын öнi сёрнитöны Косинскöй, Кочёвскöй да Гайнскöй районнэзын олiсь отир.
Лунвывся сёрнилöн аскоддяыс янсöтсьö кыдз шыэз (фонетика), сiдз и кывчукöр (лексика) ладорсянь, сiдз жö учёнöй-лингвисттэз (Р.М.Баталова, А.С.Лобанова и мöдiккез) лыддьöны сыын ассямаöн морфология и синтаксис.
Лунвывся сёрни вылын гижöм текст бöрйикö позьö мыччавны сылiсь аскоддясö «в» шы пантасьöмын, кöда сы говоррезын вермас казяссьыны быднёж: ветва, вунтыр, оз ков, ован, сiдзкö «л» шы оз пантась.
Лунвывся сёрни ас пытшкас видзö сэтшöм признаккез, кöдна пантасьöны и ойвывся сёрниын («л» шы позьö пантавны сёрниын Кудымкарскöй районiсь Ленинск ладорын).
Лунвывся сёрнилiсь аскоддясö фонетика да морфология ладорсянь пыдына исследуйтiсö Р.М.Баталова, Е.В.Ботева, З.К.Тудвасева, а лексика ладорсянь – А.С.Кривощёкова-Гантман, О.П.Аксёнова, Т.Н.Меркушева. Эта сёрни паськалö Кудымкарскöй да Юсьвинскöй районнэзын.
