Сложноподчинённöй сёрникузя – этö сэтшöм сложнöй сёрникузя, кöдаын простöй сёрникузяэз йитсьöны подчинительнöй союззэзöн либо союзнöй кыввезöн.
Ме мунi лöня, жагвыв, медбы не мешайтны вöрись олiссезлö. Ме локта сэк, кöр менö од видзчисьö.
Сложноподчинённöй сёрникузяын эмöсь главнöй да придаточнöй сёрникузяэз. Придаточнöйыс зависитö главнöйыссянь, вежöртöтö сiйö. Придаточнöй сёрникузя вермö относитчыны быдсöн главнöйыс дынö либо торья сёрникузя член дынö.
Придаточнöй сёрникузя вермö сулавны главнöй одзын, главнöйыс бöрын и сы шöрын. Сiя янсöтсьö запятöйезöн. Шуикö керсьö пауза.
Санко вöлi рад, что застанитiс вонсö. (И. Минин) – главнӧй бӧрын.
Степанколö, кöда часöт пукалiс сы телегаын, сiя дугдывтöг висьтасис и висьтасис. (И. Минин) – главнӧйыс шӧрын.
Кöр абу нянь, дак морт и клеверсö сёяс. (И. Минин) – главнӧйыс одзын.
Придаточнöй предложеннёэс главнöйыскöт йитсьöны:
- Подчинительнöй союззэзöн: что, медбы, мед, мыля, бытьтö, кыдзи, кыдз только, если, ежели.
Пожалуй, узя, если эм кытчö водны. Тэ висьтав, мыля сiдз кыскö гортö.
- Союзнöй кыввезöн (этö относительнöй местоименнёэз да наречиеэз): кин, мый, кöда, кытшöм, кытöн, кытчö, кысянь. Нiя лоöны придаточнöй сёрникузя членнэзöн и отвечайтöны кытшöмкö? юасьӧм вылö. Мунны сэтчин, кысянь он тыдав?
- Сложноподчинённöй сёрникузя туйö мыччавны схема отсӧтӧн:
- Вот и школа, кöдаын ме велöтча.
- Медбы бура тöдны велöтан предметсö, колö сiйö любитны.
- Таво, кыдз кöдзсис да садитсис, Котöрок ветлiс Сибирьö, Алтайö, Перемö, быдöнныслiсь олансö видзöтiс (В.Климов).
Сложноподчинённöй сёрникузяэз придаточнöйезлöн вежöртас сьöртi янсалöны куим группа вылö: определительнöй, изъяснительнöй да быдкодь обстоятельствоэз (кад, места, причина, цель, действиелiсь образ, степень, и с. одз.) мыччаланаöсь.
