Сложносочиненнöй сёрникузя - сложнöй сёрникузя, кöдаын простöй сёрникузяэз оз зависитö öтамöдныссянь и йитсьöны сочинительнöй союззэзöн: Неделя мымда öнi зэрис, а сэсся пондiс пöльтны тöв.
Сложносочиненнöй сёрникузяын простöйес öтамöд дынсянь янсöтсьöны запятöйöн: Лэдзчисис жагвыв ой бöра, и сöстöм руыс чуть сайкалiс. (М.Вавилин)
! Мукöдпырся, кöр и да да союззэза сложносочиненнöй сёрникузяын эм öтласа член, кöда относитчö кыкнан простöй сёрникузяыс дынö, запятöйыс оз сувтöтсьы.: Рытöн деревняын öзйисö биэз да жагöника лöньсисö быдкодь шыэз.
Сложносочинённöй сёрникузяын торрез частожык оз зависитö öтамöдныссянь, нiйö позьö вежны местаэзнаныс.
Ачыс жö пуктiс арифметика сьöртi умöль отметка, а ме виноват. – Ме виноват, а ачыс жö пуктiс арифметика сьöртi умöль отметка.
! Но пантасьлöны сложносочинённöй сёрникузяэз, кöр торрез оз позь вежны асланыс местаэзöн: Луншöрöн отир уджалö ыббез вылын, а деревня эта коста шоччисьö, узьö. Сентябрьскöй тöвчик чöвтiс кыдзлiсь платье, а зэрыс платье вылас йöктыны давай.
Сложносочинённöй сёрникузяэз асланыс вежӧртас да союззэз сьöртi янсалöны куим группа вылö.
Соединительнöй союззэза сложносочинённöй сёрникузяын простöй сёрникузяэз мыччалöны öтдруг мунан нето сьöрсьöн-бöрсьöн мунан действиеэз да состояннёэз. Простӧй сёрникузяэз йитсьӧны и, да (и вежӧртасын), сiдзжö, тожö, не ... не соединительной союззэзӧн: Фимка макнитiс кинас, и нiя Антипкаыскöт шупыта чеччöвтiсö йöр вевдöрöт. (В. Баталов) Игорь любитö лыддьöтны книгаэз природа йылiсь, сiдзжö сiя интересуйтчö фантастикаöн.
Противительнöй союззэза сложносочинённöй сёрникузяын öтiк явление сулалö мöдiклö паныт. Сэтшӧм сёрнизузяын простӧйес ӧтлаасьӧны а, но, да (но вежӧртасын) противительнöй союззэзӧн: Луншöрöн отир уджалö ыббез вылын, а деревня эта коста шоччисьö, узьö.. Рыт ни локтiс, но вöлi эшö совсем югыт.
Разделительнöй союззэза сложносочиннёнöй сёрникузяын мычассьö, что кык или унажык явленнё коласiсь вермас лоны кöдакö öтыс или явленнёэс чередуйтчöны, вежöны öтамöднысö. Простӧй сёрникузяэз коласын сулалӧны либо, нето, то ли ... то ли, то ... то, или разделительнöй союззэз: Либо тэ пырав школаас, либо ме ачым ветла öнi жö. То ли горöтлö кинкö, то ли эшö кытшöмкö шы нiя кылöны.
