Неполнöй сёрникузяöн шусьö сэтшöм сёрникузя, кöда составын оз тырмы öтiк или унажык член, но кöдö туйö кокнита адззыны одзза сёрникузяись либо паськытжык контекстiсь.
Неполнöй сёрникузяэз пантасьöны диалогическöй сёрниын.
Видзöт пример: «Тэ кытöн олан?» - «Ошибын». Ордчöтö: «Ме ола Ошибын». Мöдiк сёрникузяын сетöм только öтiк второстепеннöй член, абу не подлежащöй, не сказуемöй. Но миянлö сёрниыс вежöртана.
Или: «Зоотехник тiян абу деревняаныт?» - «Абу». Эстöн кольöмöсь и подлежащöй, и обстоятельство, и дополненнё.
Неполнöй сёрникузяэз пантасьöны и сложнöй сёрникузяэзлöн мöдiк торын: Быдöнныс лыддьöтiсö этö книгасö, а тэ – эн. Ежели бы тэ сьылан коллективын, то лок аскадö. Тамара мунiс öтладорö, а Нина – мöдöрö.
Неполнöй сёрникузяын кольöм второстепеннöй член местаын керсьö пауза, а гижикö вермас сувтöтсьыны тире. Например: Лöсьöт гожумнас додь, а тöвнас – телега.